प्रथम दक्षिण एसियाली आमन्त्रण महिला भलिबल प्रतियोगितामा नेपाल दोस्रो स्थानका लागि मङ्गलबार श्रीलङ्कासँग भिड्ने भएको छ ।
त्रिपुरेश्वरस्थित राष्ट्रिय खेलकुद परिषद्को कभर्ड हलमा आज भएको प्रतियोगितामा भारतले श्रीलङ्लाई पराजित गरेपछि नेपालले श्रीलङ्काको सामना गर्ने निश्चित भएको हो । सो जितसँगै भारतले भने एक खेल अगावै प्रतियोगिताको उपाधिमाथि कब्जा जमाएको छ । भारतले आज श्रीलङ्कालाई ३–० मा हराएको थियो । प्रतियोगितामा तीन खेल खेलेको भारतले तीनै खेलमा अपराजित रहँदै नौ अङ्क जोड्यो ।खेलको पहिलो श्रेणी निकै प्रतिस्पर्धात्मक बने तापनि दोस्रो श्रेणीमा भने श्रीलङ्काले खासै राम्रो प्रर्दशन गर्न सकेन । भारतले श्रीलङ्कामाथि खेलको पहिलो श्रेणी २६–२४, दोस्रो २५–११ र तेस्रो २५–१९ ले पराजित ग¥यो ।
त्यस्तै तीन खेल खेलेको नेपालले प्रतियोगितामा छ अङ्क बटुलेको छ भने समान खेल खेलेको श्रीलङ्काको पनि समान अङ्क नै छ । यसअघि भएको खेलमा नेपालले बङ्गलादेश र माल्दिभ्सलाई पराजित गरेको थियो भने भारतसँग हार भोगेको थियो ।सोही स्थानमा आजै भएको अर्को खेलमा माल्दिभ्सले बङ्गलादेशलाई ३–१ ले पराजित गर्दै विजयी भयो । माल्दिभ्स खेलको पहिलो श्रेणीमा २५–१७, तेस्रो २५–२३ र चौथो २५–१९ ले पराजित गर्दै विजयी भएको हो । त्यस्तै बङ्गलादेश भने खेलको दोस्रो श्रेणीमा २५–१३ ले विजयी भएको थियो ।
मङ्गलबारको पहिलो खेल बिहान १०ः०० बङ्गलादेशले भारतको सामना गर्नेछ भने दोस्रो खेल अपराह्न २ः३० बजे नेपाल र श्रीलङ्काबीच हुनेछ । रासस
