आप्रवासी माथि गोली चलाउन ट्रम्पले आदेश दिएको रिपोर्टको दाबी

आप्रवासी माथि गोली चलाउन ट्रम्पले आदेश दिएको रिपोर्टको दाबी
समाचार

अमेरिकाका राष्ट्रपति डोनल्ड ट्रम्पले आप्रवासी लश्करहरूलाई छेक्नका लागि सीमाको सुरक्षा गरिरहेका अमेरिकी सेनालाई घातक हतियार प्रयोग गर्ने अनुमति दिएको बुधवार रिपोर्ट दिइएको छ ।

ह्वाइट हाउस निर्णय बोधपत्रमा ट्रम्पले हस्ताक्षर गरेका छन् र त्यसलाई न्युजवीकले प्रकाशित गरेको हो । मध्य अमेरिकी मुलुकहरूबाट आएका हजारौं आप्रवासीले सीमामा गस्ती गर्ने एजेन्ट र अन्य सरकारी कर्मचारीमाथि हानि पुग्ने गरी
हिंसा र अव्यवस्थाका घटना गराउन सक्ने विश्वसनीय प्रमाण र सूचना प्राप्त भएको चेतावनी त्यसमा दिइएको छ ।

यसले अमेरिकी सेनाको अधिकारलाई बढाउँदै सीमा रक्षकहरूलाई सुरक्षा दिनका लागि बलप्रयोग (घातक बलसहित) गर्न, भीड नियन्त्रण गर्न, अस्थायी थुनामा लिन र सरसर्ती खोजी गर्न अनुमति दिएको छ ।

दक्षिणपश्चिमी सीमामा लगभग ५९ सय सक्रिय सेनाको महंगो तैनाथीका कारण जन्मेको विवादका बीच यो मेमो आएको हो । ट्रम्पले मध्यावधि निर्वाचनभन्दा आठ दिनअगाडि यसको घोषणा गरेका थिए ।

मिलिटरी टाइम्सले बुधवार रिपोर्ट प्रकाशित गर्दै ह्वाइट हाउसका चीफ अफ स्टाफ जोन केलीले एउटा आदेशमा हस्ताक्षर गर्दै सेनालाई घातक हतियार प्रयोग गर्नसमेत सक्नेगरी अधिकार बढाएको लेख्यो । न्युजवीकले यसलाई पुष्टि गर्दै
यो अनि ट्रम्पको मेमोसमेत प्रकाशित गरेको हो ।

पत्रकारहरूसँग कुरकानी गर्दै रक्षामन्त्री जिम म्याट्टिसले सेनाले घातक हतियार प्रयोग गर्न सक्ने स्वीकार गरे तर डिपार्टमेन्ट अफ होमल्यान्ड सेक्युरिटीबाट विशेष अनुरोध आएपछि मात्र यो अधिकार प्रयोग गर्ने बताए ।

द गार्डियनबाट

Post Comment