जिल्ला सुरक्षा समितिको बैठकले भरतपुर महानगरपालिकाको वडा नम्बर दशको चार किल्लाभित्र अर्को सूचना जारी नभएसम्मका लागि सभा, जुलुस, धर्नालगायतका कार्यक्रममा रोक लगाएको छ ।
पूर्वतर्फ मालपोत चोकदेखि जिल्ला अदालत आउने क्षेत्र, पश्चिमतर्फ चौबीसकोठीदेखि जिल्ला प्रहरी कार्यालय जाने सडक, उत्तरतर्फ मुख्य निर्वाचन अधिकृतको कार्यालय पछाडिको सडक र दक्षिणतर्फ हाकिम चोकदेखि जिल्ला कारागार आउने क्षेत्रलाई निषेधित क्षेत्र घोषणा गरिएको हो ।
मतगणनाका क्रममा मतपत्र च्यातिएपछि निर्वाचन अयोगले वडा नम्बर १९ मा पुनः मतदान गर्ने निर्णय गरेको थियो । नेपाली कांग्रेस र नेकपा माओवादी केन्द्रले यसको स्वागत गरेका छन् भने नेकपा एमालेले निर्णयको विरोध गर्दै कानुनी उपचार खोज्ने बताएको छ । आन्दोलनमा उत्रिने एमाले तयारीसँगै निषेधित क्षेत्र घोषणा गरेको हो ।
भरतपुर महानगरमा नेकपा एमालेका देवी ज्ञवाली र नेकपा माओवादी केन्द्रकी रेणु दाहाल मेयरका उम्मेदवार छन् । दाहाल भन्दा ज्ञवाली करिब सात सय मतले अगाडि छन् ।
