पोर्चुगलका पूर्वप्रधानमन्त्री गुटेरेस राष्ट्रसङ्घको महासचिवमा

“महासचिवका लागि हामीले एन्टोनियो गुटेर्रेसलाई छनौट गरेका छौं,” अक्टोबरका लागि राष्ट्रसङ्घको सुरक्षा परिषद्का अध्यक्ष रहनुभएका रुसका राजदूत भिताली चुर्किनले भन्नुभयो ।

औपचारिक मतदान भने स्थानीय समयाअनुसार बिहीबार बिहान १० बजे गर्ने तय भएको र अनौपचारिक तहबाट पारित नामलाई मतदानबाट पनि अनुमोदन गर्ने विश्वास लिइएको उहाँले बताउनुभएको छ

वर्तमान महाचिव बान की मुनको कार्यकाल यही डिसेम्बर ३१ मा सकिएपछि सन् २०१७ जनवरी एकदेखि गुटेर्रेसले महासचिवको जिम्मेवारी सम्हाल्नु हुनेछ । उहाँले यसअघि राष्ट्रसङ्घ शरणार्थी आयोगको प्रमुखको जिम्मेवारी पनि निभाउनुभएको थियो ।

बुधवार सुरक्षा परिषद्को बैठकले छनौट गरेपछि अब उहाँको नाम परिषद्का १५ देशले मतदानमार्फत् औपचारिकरुपमा छनौट गर्नेछन् ।

परिषद्ले मतदानमार्फत छनौट गरेको व्यक्तिलाई १९३ देश नै सहभागी महासभाले अन्तिम अनुमोदन गर्नु पर्ने छ ।

उहाँको नामलाई अनुमोदन गर्नका लागि जातिसक्दो चाँडो महासभा बोलाउने तयारी भइरहेको महासभाका अध्यक्ष पिटर थोमसनका प्रवक्ताले जानकारी दिनुभयो ।

राष्ट्र सङ्घको महासचिवमा छानिनु भएका ६६ वर्षका गुटेर्रेसले आफ्नो छनौटका बारेमा अहिलेसम्म कुनै प्रतिक्रिया दिनुभएको छैन । उहाँ सन् १९९५ मा पोर्चुगलको प्रधानमन्त्री चुनिनुभएको थियो ।

“नयाँ महासचिव छनौट गर्ने यो निकै महत्वपूर्ण प्रक्रिया हो, हामीले उच्च जिम्मेबारीबोधका साथ त्यस प्रक्रियालाई अगाडि बढाइरहेका छौं ।” चुर्किनले थप्नुुभयो ।

यसैबीच ब्राजिल र अर्जेन्टिनाले गुटेर्रेस राष्ट्रसङ्घको नयाँ महासचिव छनौट प्रक्रियामा पर्नुभएको भन्दै उहाँलाई बधाइ तथा शुभकामना व्यक्त गरेका छन् ।