एनआरएन अन्तर्राष्ट्रिय समितिको निर्देशनलाई वेवास्ता गर्दै एनआरएन अमेरिकाको निर्वाचन समितिले उम्मेदवारहरुको अन्तिम नामावली प्रकाशित गरेको छ ।
बुधबार मध्यराति निर्वाचन समितिले उम्मेदवारहरुको अन्तिम नामावली प्रकाशित गरेको छ । आयोगले अगष्ट ११ र १२ तारिकमा हुने चुनावमा लाग्ने जनाएको छ । समितिले दुईसय एक जना उम्मेदवारको नाम सार्वजनिक गरेको छ ।
उम्मेदवारको अन्तिम नामावली प्रकाशित गर्दा महासचिवका उम्मेदवार पूर्णचन्द्र बानियाको नाम समितिले हटाएको छ ।
अमेरिकाको एनआरएनमा उम्मेदवारको योग्यता विवाद रहेको छ । यही विवादका कारण अध्यक्षका प्रत्याशी गौरीराज जोशीको उम्मेदवारको आवेदन निर्वाचन समितिले रद्ध गरेर नाम प्रकाशित गरेको छैन । यो विषय गत साता जर्मनीको फ्र्यांकफर्टमा भएको एनआरएन आइसिसीको बैठकमा समेत प्रवेश भएपछि योग्यता छानबीन गर्न समिति गठन भएको छ ।
समितिले प्रतिवेदन नदिएसम्म चुनावी कार्यक्रम समायोजन गर्न तीन दिन अघि आइसिसीले निर्वाचन समितिलाई निर्देशन दिएको थियो । आइसिसीले अगष्ट ५ भित्र प्रतिवेदन प्राप्त हुने भएकोले त्यतिन्जेलसम्म चुनावी कार्यक्रम समायोजन गर्न निर्देशन दिएको थियो ।
तर यो निर्देशनको बेवास्ता गर्दै निर्वाचन समितिले बुधबार राति उम्मेदवारको सूचि प्रकाशित गरेको छ । समितिको यो कार्यले निर्वाचन समितिले समेत विवाद चर्काउने नियत राखेको आरोप सदस्यहरुको छ ।
एनआरएन अमेरिकाको निर्वाचन समितिले उम्मेदवारको सूचिमा नपारेपछि गौरीराज जोशी आफ्नो धारणा राख्न यो साता अमेरिकाको पश्चिमी राज्य क्यालिफोर्निया जाँदैछन् । उनले त्यहाँका दुई ठूला शहरहरुमा नेपाली समुदायसँग भेटेर आफु माथि भएको अन्यायका बारेमा धारणा राख्नेछन् ।
अगष्ट ४ तारिक लसएन्जलस र ५ तारिक सानफ्रान्सिस्कोमा आयोजना हुने कार्यक्रममा जोशी सहभागी हुने कार्यक्रम रहेको छ ।
