एनआरएन अमेरिका निर्वाचनको महाभारत सकिने नपाउँदै अमेरिकामा गैर आवासीय नेपाली संघको (एनआरएनए) नेतृत्वजानेको तयारी सुरु भएको छ । आउने अक्टोबर १३ देखि १७ तारिखसम्म काठ्माडौ हायात होटलमा हुन लागेको एनआरएनएको विश्व सम्मेलनमा नयाँ नेतृत्व चयन गर्ने छ ।
आईसीसीमा अध्यक्ष बाहेक उपाध्यक्ष लगायत अन्य पदमा अमेरिकाका पदाधिकारीले उम्मेदवार बन्ने योजना बनाएका छन् । उत्तर अमेरिका क्षेत्रिय संयोजक सोनाम लामा आईसीसी उपाध्यक्षमा उठ्ने अनौपचारिक तयारी शुरु गरिसकेको छन् । बाल्टिमोरमा शनिवार भएको एनआरएन अमेरिका भेलामा उनले खुलेर उपाध्यक्षमा उठ्ने भन्दै भोट मागेका थिए । वर्तमान अध्यक्ष शेष घले निकट मानिने लामा यस पटक अध्यक्षमा उम्मेदवारी घोषणा गरेका भवन भट्टको समूहवाट उपाध्यक्ष उम्मेदवार हुने चर्चा छ ।
तर, यसवारेमा भने सोनामले खुलेर बताएका छैनन् । अध्यक्ष घले पत्नी जमुना घले अध्यक्षमा उठ्ने चर्चाले पनि उनी कुन समूहवाट उठ्ने खुल्न सकेका छैनन् । जमुना उठ्ने या नउठने एक साता भित्र तय हुने छ । शनिवार भेलामा सहभागी हुन केही दिनका लागि अमेरिका आई पुन नेपाल फर्किएका सोनामले नेपाल जाने बेलामा एनआरएन अमेरिकाका पदाधिकारीसँग चुनावमा सहयोग गर्न भनेका थिए ।
एनआरएन अमेरिकाका हालै निर्वाचित कार्यसमितिको पहिलो वैठक भित्रै बसेर सोनामले काठमाडौ जाने प्रतिनिधि छान्ने समूहमा पासांग लामालाई राख्न भनेका भनेका थिए ।
अमेरिका एनआरएनवाट उपाध्यक्षका अर्का आकांक्षी खगेन्द्र जीसी हुन् । जिसी दुइ बर्ष अघि पनि उपाध्यक्षमा उम्मेदवारी दिई पराजित भएका थिए । पराजित भएलगत्तै अलि निराश देखिएका जिसीलाई एनआरएनए संस्थापक अध्यक्ष उपेन्द्र महतोले त्यसबेला अहिले तयारी अलि कम भएकाले नजितेपनि अर्को पटक जित्नुहुन्छ भनेका थिए ।
त्यसवेला महतोले अर्को पटकलाई आफुले पनि सकृय भएर जिसीलाई सघाउने वचन दिएका थिए । भद्र स्वभावका जिसी एनआरएन नागरिकता समुहमा सहसंयोजक छन् । जिसीलाई भने यस पटक पनि उपाध्यक्ष जित्न बढीनै मेहनत गर्न जरूरी छ । किनभने पहिलो उनी अमेरिकावाट सर्वसम्मत उम्मेदवार हुन सकेका छैनन् ।
दोस्रो, एनआरएन अमेरिकाको निर्वाचनमा उनले अध्यक्षमा कृष्ण पोखेरेलको पक्षमा खुलेर मत मागेका थिए । यसले गर्दा पनि जिसीलाई आलोचना गर्नेहरु छन् ।
जिसीले अध्यक्ष घलेसँगपनि आफ्नो उम्मेदवारीका वारेमा सहयोग र सल्लाह मागेका थिए । तर, घलेले यसपटकलाई नउठन् फेरि दुइ बर्ष कुर्न उपयुक्त हुने सुझाव दिएको बताईएको छ ।
आफु निकट सोनाम उठेकाले पनि घलेले कुर्न सुझाव दिएको हुनुपर्छ । उत्तर अमेरिका क्षेत्रिय संयोजक (आरसी) र उपसंयोजक (डीआरसी) पदमा भने प्रतिस्पर्धा छ । वर्तमान डीआरसी एसी शेर्पाले आरसी उठ्ने घोषणा गरेका छन् । उनले यसका लागि प्रचार प्रसार समेत गरिसकेका छन् । घले र सोनाम निकट मानिने शेर्पा वासिंटन राज्यका लागि नेपालका महाबाणिज्यदुत पनि हुन् ।
तर, यही पदमा अन्यको पनि दावेदारी छ । न्यूयोर्कका श्री पराजुलीले आरसी उठ्ने वताएका छन् । मिलेर जाने यस्तो अवस्था नआए एसीसँग भिड्ने तयारी पराजुलीको छ ।
डीआरसीमा भने चार जनाको दावेदारी रहेको वताईएको छ । तर, कसैले औपचारिक रुपमा घोषणा गरेको छैन । आरसी र डीआरसी पदमा उत्तर अमेरिका क्षेत्रमा पर्ने देश मेक्सिको, अमेरिका र क्यानडाका प्रतिनिधिले भोट दिन पाउँछन् । यसमा मुख्य अमेरिका र क्यानडानै हो । यी दुई देशवाट करिव तीन सय मतदाता हुने छन् ।
एनआरएन अमेरिकाका अध्यक्ष डा. केशव पौडेल र गौरीराज जोशी बीच निर्वाचन अघि सिकागोको हिलटन होटलमा सहमति भएको थियो । यही सहमति अनुसार गौरी जोशीले आफु उम्मेदवार बन्न पाउनुपर्छ भन्दै अमेरिकाको टेनेसी अदालतमा हालको मुद्दा फिर्ता लिएका थिए ।
यो मुद्दा फिर्ता लिएपछिनै रोकिएको एनआरएन अमेरिकाको निर्वाचन प्रकृया अघि वढेको थियो । सिकागो सहमतिका लागि मुख्य भुमिका नेपाल र टेक्ससमा बस्ने हरिवोल भण्डारीको थियो ।
मुद्दा हालेको केही दिन पछि भण्डारी र गौरीबीच सम्पर्क भयो । गौरीले अझ पनि मिल्न सकिने बताएपछि भण्डारीले डा पौडेलसँग वार्ता गराएका थिए । राजनीतिमा अनुभवी भण्डारीले सहमती गर्न दुवै इच्छुक देखिएपछि एनआरएनए उपाध्यक्ष कुमार पन्तलाई समेत सहभागी गराई डा. पौडेल र गौरीबीच सिकागोमा भेटवार्ता गर्ने कार्यक्रम मिलाएका थिए ।
टेक्ससमा हल्ला हुन्छ भनेर सहमति गोप्य रुपमा सम्पन्न गर्न सिकागो छानिएको थियो । यो रणनीति अनुसार गौरी र हरिबोल सिकागो उडे । त्यस पछि पैडेल पनि त्यहाँ पुगे । कतारवाट कुमार पन्त पनि सिकागो आईपुगे ।
सिकागोको अन्तराष्ट्रिय एयरपोर्ट नजिकै रहेको हिल्टनमा वसेर उनीहरु बीच सहमती भयो । झण्डै पाँच घण्टा अमेरिका बसेर कुमार कतार फर्किए । यो पाँच घण्टाका लागि कुमारले करिव २५ घण्टाको उडान गरेका थिए । सहमतिमा गौरीले मुद्दा फिर्ता लिने, डा पौडेललाइ अध्यक्ष पदमा सघाउने सहमति भयो ।
गौरीलाई पनि डा पौडेलले उनले मागेको पदमा सहयोग गर्ने सहमति भएको थियो । यो सहमती मान्ने हो भने अब गौरीले कुन पदमा जान चाहान्छन् त्यस अनुसार डा पौडेलले सहयोग गर्नुपर्छ । गौरीले कुन पदमा जाने सार्वजनिक रुपमा भनेका छैनन् ।
उनी परामर्श गरिरहेको उनका निकट वताउँछन् । आरसी वा आईसीसीका अन्यपदमा जाने संभावनाका बारेमा परामर्श भईरहेको वताईएको छ । परिस्थिति प्रतिकुल भए कुनै पदमा नजाने अवस्था समेत आउन सक्ने उनका निकटले वताए । हरिबोल भने आफ्ने पहलमा भएको सिकागो सहमति पुर्ण रुपमा पालना गर्नु पर्छ भन्ने पक्षमा छन् ।
यस अनुसार उनी गौरीलाई सघाईरहेका छन् । सिकागो सहमति अनुसार नै डा पौडेलले पनि नेपाल जाने प्रतिनिधि छान्ने टिममा गौरीलाई प्रस्ताव गरेका हुन् । कुमार पन्तले भने गौरीलाई आरसीवा महत्वपुर्ण जिम्मेवारीको पदमै आउन सुझाव दिएका छन् ।
सिकागो सहमतिका वारेमा विभिन्न तर्क विकर्तहरु आईरहेको छ । आरसी पदमा सहमति भएको थियो, पैसा लेनदेन भयो जस्ता हल्लाहरु आएका छन् । तर, यो सहमतिमा बसेका चारै जनाले यी दुवै हल्लालाई असत्य दावी गरेका छन् । त्यहाँ न पैसाको लेनदेन भयो न पदको नै, सहमतिमा सहभागीले भने ।
