सिन्धुपाल्चोकका एक जना नेता शनिबार एमालेको हेडक्वार्टरमा औपचारिक कार्यक्रमका बीच एमाले प्रवेश गरेका छन् ।
नेकपा एमालेको धुम्बाराहीस्थित केन्द्रीय कार्यालयमा शनिबार विशेष कार्यक्रमका बीच राप्रपाका सिन्धुपाल्चोकका नेता धर्मराज भण्डारीको नेतृत्वमा सयौँ कार्यकर्ता एमालेमा प्रवेश गरेका हुन् । एमालेको नेतृत्वमा मात्र देश विकास हुने र जनताको भलो हुने भएकाले आफ्नो नेतृत्वमा १५ सय जना एमाले प्रवेश गरेको उनले बताए । भण्डारी सिन्धुपाल्चोक क्षेत्र नम्बर १ का तत्कालिन उम्मेदवार हुन् ।
कार्यक्रममा अध्यक्ष केपी शर्मा ओलीले देश एमालेमय बनेको बताए । स्थानीय चुनावपछि अरु पार्टीहरुको साइनबोर्ड मात्रै बाँकी रहने उनको दाबी छ । अरु पार्टीको कार्यालयमा अर्थहीन साइनबोर्ड मात्रै झुड्याएको बताउँदै ओलीले भने – ‘अहिले कतिपय दलहरु केटाकेटीले काडाकुँटी खेलेजस्तो गरिरहेका छन् । केटाकेटीले खेल्दा चामल हुँदैन तर पनि भात पकाएको नक्कल गर्छन् । ती पार्टीहरुमा पनि त्यस्तै भइरहेको छ । साइनबोर्ड झण्ड्याएका छन्, तर तिनीहरुसँगै कार्यकर्ता छैनन् ।’
एमालेमा एकताबद्ध हुन आह्वान गर्दै उनले पार्टी छाडेर विभिन्न पार्टीमा पुगेकालाई पनि फर्कन आह्वान गरे । अध्यक्ष ओलीले एकछिन कार्यकर्ताहरुलाई रमाइलो पनि गराए । आफूलाई गीत गाउन नआउने बताउँदै ओलीले गीतकै भाकामा भने, ‘फर्क फर्क नेपाली दाजुभाई एमालेमै फर्क ।’
अध्यक्ष ओलीले संविधान संशोधन गर्न फेरि नयाँ बुँदा थपिएको भन्दै आपत्ति जनाए । ‘निर्वाचन भाड्न फेरि अर्को र्याङर्याङ सुरु भएको छ । त्यो एमालेलाई अमान्य छ।’ उनले भने ।
‘सिंहदरबारमा दिन दिनै मोर्चासँग वार्ता भइरहेको छ । त्यो वार्ता देश बनाउन होइन भाँड्न हो,’ प्रधानमन्त्री पुष्पकमल दाहाल प्रचण्डप्रति लक्षित ओलीले प्रश्ने गरे, ‘यो मधेसी मोर्चासँग नातिको पालालसम्म वार्ता गर्ने हो कि देश पनि विकास गर्ने हो ?’
