चुनाव बहिष्कार गर्ने घोषणासहित आन्दोलनमा उत्रिएको राष्ट्रिय जनता पार्टीलाई सरकारमा रहेको दल नेपाल फोरम लोकतान्त्रिक पार्टीले समर्थन गर्ने भएको छ ।
फोरम सरकारमा उपप्रधानमन्त्री एवं स्थानीय विकासमन्त्री विजय गच्छदारको पार्टी हो । फोरमले संविधान संशोधनको माग गर्दै तराईमा गरिरहेको बन्द, हड्ताल लगायतका कार्यक्रममा साथ दिने घोषणा गरेको छ । जसअनुसार गच्छदारको पार्टीले ५ नम्बरको प्रदेशका ३ जिल्ला रुपन्देही, नवलपरासी र कपिलवस्तुमा समर्थन गर्नेछ ।
बुधबार नेपाल फोरम लोकतान्त्रिक पार्टीको रुपन्देही जिल्ला कार्यालय भैरहवामा बसेको ५ नम्बर प्रदेशको तीन जिल्लाको बैठकले राजपाको आन्दोलनमा समर्थन गर्ने निर्णय गरेको हो ।
५ नम्बरको प्रदेशको तीन जिल्ला रुपन्देही, नवलपरासी र कपिलवस्तुका जिल्ला अध्यक्ष, उपाध्यक्ष, केन्द्रीय सदस्य लगायत पार्टीका अन्य नेताको बैठकले मधेसमा जारी आन्दोलनमा समर्थन गर्ने निर्णय गरेको हो ।
बैठक पश्चात लोकतान्त्रिक पार्टीका रुपन्देही, नवलपरासी र कपिलवस्तुका जिल्ला अध्यक्षद्वारा हस्ताक्षरित जारी विज्ञप्तिमा मधेसी जनताको माग पूरा नगरी चुनावको घोषणा गरी मधेसमा द्वन्द्व निम्त्याउन खोजिएको भन्दै गम्भीर ध्यानार्कषण भएको उल्लेख गरिएको छ ।
