कास्की क्षेत्र नम्बर २ को प्रदेश सभा २ मा बागी उम्मेदवारी दिएका नरेशशंकर पालिखे साधारण सदस्यसमेत नरहने गरी कारवाहीमा परेका छन् ।
कांग्रेसको अनुशासनमा नबसी निर्वाचनमा असहयोग गर्ने गरी बागी उम्मेदवारी दर्ता गराएको भन्दै नेपाली कांग्रेस कास्कीले बिहीबार निश्कासन गरेको हो ।
कास्की कांग्रेसका कार्यवाहक अध्यक्ष सुदीपमोहन भट्टराईले जारी गरेको विज्ञप्तिमा पार्टी संकटमा रहेका बेला अनुशासनभन्दा बाहिर गएर पार्टी विरुद्ध उम्मेदवारी दिने पालिखेलाई सदस्यबाट निश्कासन गरिएको जानकारी गराउँदै सहयोग नगर्न आग्रहसमेत गरिएको छ ।
‘कांग्रेसको केन्द्रीय कार्यसमितिको परिपत्रअनुसार उनलाई पार्टीबाट निष्काशन गरिएको हो,’ विज्ञप्तिमा भनिएको छ । निश्काशनमा परेका सदस्यलाई कांग्रेसनिकटका कुनै भातृ संगठनलाई पनि सहयोग नगर्न आग्रह गरिएको छ ।
‘पालिखेले आफ्नो उम्मेदवारी दर्ता गराएको बखतदेखि नै कांग्रेसको महाधिवेशन प्रतिनिधि, क्षेत्रीय प्रतिनीधि, क्रियाशील सदस्य र साधारण सदस्यसमेत नरहेको जानकारी गराइन्छ,’ विज्ञप्तिमा भनिएको छ ।
कास्की क्षेत्र नम्बर २ को प्रदेश सभा २ मा कांग्रेसबाट टिकट पाएका विन्दुकुमार थापा उम्मेदवार रहेको क्षेत्रमा पालिखेले बागी उम्मेदवारी दिएका छन् । पार्टीले आधिकारिक उम्मेदवारकै पक्षमा माहौल सिर्जना गर्न कार्यकर्तालाई आग्रह गरेको छ ।
कास्की कांग्रेसले वामगठबन्धन गरी कम्युनिष्टहरु एकतन्त्रीय शासन प्रणालीमा जान खोजिरहेको र देशमा फेरि अर्को द्वन्द्व निम्त्याउन खोजिरहेको स्थितिमा अनुशासनभन्दा बाहिर गएर यसो गर्ने व्यक्तिलाई कांग्रेसले स्विकार्न नसक्नेसमेत बताएको छ ।
नेपाली कांग्रेस कास्कीले प्रेस विज्ञप्ती जारी गर्दै यस्ता क्रियाकलापबाट हतोत्साही नभई पार्टीको तर्फबाट आधिकारिक उम्मेदवारी दिएका उम्मेदवारहरुलाई विजयी गराउन संगठित भएर लाग्न कार्यकर्ताहरुलाई आग्रह गरेको छ ।
