पेट्रोलियम पदार्थको मूल्यबृद्धि खारेजको माग गदै विद्यार्थी संगठनहरुले उद्योग, वाणिज्य तथा आपूर्ति मन्त्री मातृका यादवलाई ज्ञापन पत्र बुझाएका छन् ।
सोमबार मन्त्रालयमा नेकपा निकटका दुई विद्यार्थी संगठन अनेरास्ववियु र अनेरास्ववियु क्रान्तिकारी, प्रमुख प्रतिपक्षी नेपाली कांग्रेस निकटको नेपाल विद्यार्थी संघ र अखिल छैठौंले संयुक्त रुपमा ज्ञापनपत्र बुझाएका हुन् ।
विद्यार्थी संगठनहरुले सरकार नियन्त्रित नेपाल आयल निगमले पेट्रोलियम पदार्थमा श्रृखलाबद्ध रुपमा गरेको मूल्यवृद्धि प्रति गम्भीर ध्यानाकर्षण भएको बताएका हुन् ।
विद्यार्थी संगठनहरुले गैरजिम्मेबार ढंगमा बढाइएको मूल्यबृद्धि अबिलम्ब खारेज गर्न माग गरेका छन् अन्यथा संघर्षमा उत्रन आफूहरु बाध्यहुने चेतावनी दिएका छन् ।
विद्यार्थी संगठनहरुले बहुसंख्यक जनता गरिबीको रेखामुनी रहेको हाम्रो जस्तो देशमा सरकार केबल व्यापारी मात्र बन्न नसक्ने उल्लेख गरेको छ । अत्यावश्यक क्षेत्रमा सरकारले जनतालाई राहत र सहुलियतको माग गरेका छन् ।
ज्ञापन पत्र बुझ्दै मन्त्री यादवले बेथिति अन्त्यका लागि आफू लागि पर्ने भन्दै आन्दोलनमा नउत्रन विद्यार्थी संगठनहरुलाई आग्रह गरेको अनेरास्ववियुका सचिव आरसी लामिछानेले जानकारी दिए ।
निगममा हुने भ्रष्टाचार र चुहावट नियन्त्रणका लागि आफूले प्रयास गर्ने मन्त्री यादवले बताए । ‘भ्रस्टाचार हटाउन मेरो एक्लो प्रयासले हुँदैन सवैले सहयोग गर्नुपर्छ ।’ मन्त्री यादवले भने ।
‘भण्डारण नभएका कारण समस्या छ ।’ आपूर्तिमन्त्री यादवले भने‘ अनुगमन गरौं मेरो आग्रह के छ भने आन्दोलन नगर्नुस्, छलफल गरु सबै मिलेर देश बनाउनुपर्छ ।’
