विप्लव नेतृत्वको माओवादीका कार्यकर्तासँगको दोहोरो मुठभेडमा प्रहरीको गोली लागेर विप्लव समूहका एक कार्यकर्ता घाइते भएको प्रहरीले बताएको छ ।
स्रोतका अनुसार घिमिरेको खुट्टामा गोली लागेको छ । उनलाई उपचारका लागि एम्बुलेन्सबाट भोजपुर अस्पताल ल्याइँदै गरेको बताइएको छ । उनको साथमा हतियारसमेत फेला परेको प्रहरीको भनाइ छ ।
मंगलबार दिउसो करिब सवा १ बजेतिर टेम्केमैयुङ गाउँपालिका–२ छिनामखुस्थित धोद्रे जङ्गलमा विप्लवका हतियारधारी लडाकु समूहसँग प्रहरीको जम्काभेट भएको भोजपुरका प्रमुख जिल्ला अधिकारी नुरहरी खतिवडाले बताए ।
छिनामखु र खोटाङको केपलासगढी गाउँपालिकाको सीमा क्षेत्रमा पर्ने भिडन्तस्थलमा उनीहरुले प्रहरीमाथि फायर खोलेको र जवाफी कारवाहीमा घिमिरेलाई गोली लागेको प्रजिअ खतिवडाले दावी गरेका छन् । दर्जनौंको समूहमा रहेका हतियारधारी समूह त्यहाँबाट जङ्गलको बाटो हुँदै भागेको पनि उनको भनाइ छ ।
केहिदिनदेखि भोजपुर, खोटाङ र सोलुखुम्बुको सीमा क्षेत्र मैयुङ, दोभानेमा विप्लवका कार्यकर्ता रहेको प्रहरीले सूचना पाएको जनाएको छ । सोही सूचनाको आधारमा प्रहरी, सशस्त्र प्रहरी लगायत टोलीले चारैतिरबाट घेरा हालिरहेको बताइन्छ । घटनाको विस्तृत विवरण अझै आउन बाँकी रहेको प्रजिअ खतिवडाले बताएका छन् ।
