वि.सं. २०७६ श्रावण २८ गते मङ्गलबार तदनुसार ई. सं. २०१९ अगस्ट १३ तारिख, परिधावी नामक संवत्सर, सूर्य दक्षिणायन, वर्षा ऋतु, आज कुनै विशिष्ट चाडपर्व र उत्सव छैन अनि कुनै मुहूर्त पनि जुरेको देखिंदैन । श्रावण शुक्लपक्ष (गुँलाथ्व) त्रयोदशी तिथि, दिउँसो ०१:४३ बजेसम्म, त्यसपछि चतुर्दशी तिथि, उत्तराषाढा नक्षत्र, (अहोरात्र व्याप्त), चन्द्रमा धनु राशिमा, दिउँसो १०:३९ बजेसम्म, त्यसपछि मकर राशिमा, प्रीति योग, दिउँसो १२:५१ बजेसम्म, त्यसपछि आयुष्मान् योग, सुरुमा तैतिल करण दिउँसो ०१:४३ बजेसम्म, त्यसपछि गर करण मध्यरात्रीपछि ०२:१८ बजेसम्म, अन्तिममा वणिज करण, आनन्दादि योग : मानस, चन्द्रवर्ण : कालो, चन्द्रदिशा : दक्षिण, योगिनीदिशा : दक्षिण, वारशूल : उत्तर, काठमाण्डौ, नेपालमा, सूर्योदय : बिहान ०५:३२ बजे, सूर्यास्त : साँझ ०६:४३ बजे, दिनमान : ३२ घडी ५७ पला (१३ घण्टा ११ मिनेट, रात्रीमान : २७ घडी ०३ पला (१० घण्टा ४९ मिनेट)
मेष (चु, चे, चो, ला, लि, लु, ले, लो, अ) –
बन्दव्यापारमा राम्रै छ र लगानीबाट फाइदा हुन्छ । कर्मचारीले हाकिम र छात्रछात्राले गुरुजनको सामीप्यता पाउने समय छ । एकाबिहानै मनमा वैराग्य र निराशाको भाव उत्पन्न हुनसक्छ, तर दिन ढल्दै जाँदा कर्मप्रति समर्पित भई खट्ने अनुकूलता मिल्नेछ । आज बन्दव्यापार र कामधन्धाका क्षेत्रमा सधैंभन्दा बढी मिहिनेत गर्नु पर्नेछ । आज कर्मक्षेत्रमा चन्द्रमाको प्रवेश हुँदैछ, अब कामधन्दा र लक्ष्यप्रति सजग हुने वेला हो, प्रेमसम्बन्ध र दाम्पत्य जीवनका लागि समय निकाल्न नसक्नाले तिक्तता आउन सक्छ, तर घरायसी वातावरण धमिलिने स्थिति बन्दैन । खटेजति सफलता पाइने योग छ, जिम्मेबारीको क्षेत्रमा लगनशील भएमा अवश्यमेव लाभ मिल्ने समय छ ।
शुभरङ्ग : कालो
शुभअङ्क : २
शुभदिशा : दक्षिण
इष्टदेवता : कुल/पितृदेवता
अशुभ रङ्ग : कलेजी
अशुभ अङ्क : ५
अशुभ दिशा : पूर्व
कार्यसिद्धि मन्त्र : ॐ कुलदेवताभ्यो नमः
न्यूनतम जापसङ्ख्या : २३
के गर्ने : जग्गाजमिन र घरायसी बन्दोवस्तीको प्रयास
के नगर्ने : अल्छीपन र अकर्मण्यता
बृष (इ, उ, ए, ओ, बा, बि, बु, बे, बो) –
आजको दिन मिश्रित फलदायी रहेको छ । उदयकालमा आयुक्षेत्रमा चन्द्रमा छ, तर आज दिउँसोबाट चन्द्रमाले भाग्यभावमा प्रवेश गर्दैछ । त्यसैले अब उद्देश्य, लक्ष्य र कर्मप्रति निष्ठा राखी अघि बढ्दा सफलता आर्जन गर्न सकिने समय आएको छ । परोपकार र धार्मिक क्षेत्रका क्रियाकलापमा ध्यानकेन्द्रित हुनसक्छ । सृजनात्मक कामबाट आत्मसन्तुष्टि प्राप्त हुनेछ । दिन छिप्पिंदै जाँदा भाग्यबल बढ्दै जाने समय छ । साँझमा परिवारमा रमाइलो जमघट हुनेछ । उतारचढाव आएपनि व्यापारबाट राम्रै नाफा मिल्नेछ । दाम्पत्य जीवनमा उतारचढाव आउन सक्छ । बिहानीपख चन्द्रमाको प्रतिकूलता हुने भएकाले आज जे गरे पनि अपराह्नको समय राम्रो हुनेछ ।
शुभरङ्ग : गाढा पहेंलो वा केशरी
शुभअङ्क : ९
शुभदिशा : पूर्व
इष्टदेवता : धर्मराज
अशुभ रङ्ग : चम्किलो/उज्यालो
अशुभ अङ्क : ४
अशुभ दिशा : उत्तर
कार्यसिद्धि मन्त्र : ॐ धर्मराजाय नमः
न्यूनतम जापसङ्ख्या : १९
के गर्ने : धार्मिक, सामाजिक र परोपकारी काम
के नगर्ने : अपमान
मिथुन (का, कि, कु, घ, ङ, छ, के, को, ह) –
दिउँसोसम्म राम्रो दिन रहेकाले तपाईंले कुनै महत्वपूर्ण काम छ भने मध्याह्नभित्रै सिद्ध्याउनु राम्रो हुनेछ । सुरुवातमा मन प्रफुल्ल रहने छ र आत्मबल बढ्नेछ । बन्दव्यापारमा राम्रै देखिन्छ, तर दिन ढल्नासाथ अष्टम भावमा चन्द्रमाको प्रवेश हुने हुँदा त्यसपछि गरेका कामधन्दामा ढिलो गरी सफलता पाउने दिन छ । आजको दिन साथीभाइ र समाजले तपाईंको भावनालाई ढिलो गरी बुझ्ने छन् । साँझपख मनमा डर र त्रासको निवास हुनेछ, के गर्ने के नगर्ने भन्ने बेचैनी हुनसक्छ । स्वास्थ्यमा समेत सामान्य कमजोरी भएको अनुभूति हुनेछ । मन भावना र कल्पनामा रुमल्लिन सक्छ । किशोरकिशोरीमा चिडचिडेपन र झर्कोफर्को बढ्ने समय हो, संयम र धैर्य हुनु जाति हुन्छ ।
शुभरङ्ग : नीलो
शुभअङ्क : ८
शुभदिशा : उत्तर
इष्टदेवता : भगवान् महादेव
अशुभ रङ्ग : हरियो
अशुभ अङ्क : ३
अशुभ दिशा : पश्चिम
कार्यसिद्धि मन्त्र : ॐ मृत्युञ्जयाय नमः
न्यूनतम जापसङ्ख्या : १०
के गर्ने : आवेग, संवेग, रिसराग र क्रोधमा नियन्त्रण
के नगर्ने : सट्टापट्टा र जोखिमपूर्ण काम
कर्कट (हि, हु, हे, हो, डा, डि, डु, डे, डो) –
रामरमाइलो र कामधाममा सफलता पाउने दिन छ । आज दिउँसोसम्म छैंठौं भावमा रहेको चन्द्रमा सकारात्मक रहेकाले मावली वा आमाको आशीर्वाद प्राप्त हुनेछ । मनमा उल्लास, हर्ष र आनन्दको वातावरण प्राप्त हुनेछ । अपराह्नपछि सातौं भावमा चन्द्रमाले प्रवेश गर्नेछ, अझ उत्कृष्ट समयको सुरुवात हुनेछ । सबैखालका झैझमेला र अनिष्टहरू मत्थर हुन थाल्नेछन् । लामो दूरीको यात्राको योजना छ भने बेलुकीपख अनुकूल हुन्छ । मन आनन्दप्राप्तिका लागि आकर्षित बन्नेछ र विलासिताका भावनाहरू जागृत हुनेछन् । पारिवारिक खुसीका लागि खर्च बढ्ने छ । छात्रछात्रा कुनै परिणामको पर्खाइमा हुनुहुन्छ भने खुसीको खबर प्राप्त हुने सम्भावना देखिन्छ ।
शुभरङ्ग : हलुका रातो
शुभअङ्क : ७
शुभदिशा : पश्चिम
इष्टदेवता : राधाकृष्ण
अशुभ रङ्ग : पहेंलो
अशुभ अङ्क : २
अशुभ दिशा : दक्षिण
कार्यसिद्धि मन्त्र : ॐ कामदेवाय नमः
न्यूनतम जापसङ्ख्या : ११
के गर्ने : पति/पत्नी र प्रेमी/प्रेमिकाको भावनालाई बुझ्ने प्रयास गर्ने
के नगर्ने : कामुकता
सिंह (मा, मि, मु, मे, मो, टा, टि, टु, टे) –
बिहानको समय राम्रो छ । सकारात्मक र व्यवहारिक सोचको विकास हुनेछ । बन्दव्यापार र पेसाबाट सन्तुष्टि मिल्ने देखिन्छ । बिहानको चिन्तन र सोचले समग्रमा फाइदा नै हुनेछ । छोराछोरीबाट सन्तोष प्राप्त हुनेछ । इष्टमित्रले प्रशंसा गर्नेछन् । आज दिउँसो छैंठौं भावमा चन्द्रमाको प्रवेश हुँदैछ, त्यसैले तर्क, बहस र वादविवादको स्थिति सिर्जना हुनसक्छ वा कुनै झैझगडा, किचलो र विवादमा मेलमिलापका लागि तपाईं अघि सरेर अहम् भूमिका निर्वाह गर्नु पर्नेछ । अपराह्नपछि मन बिथोलिने दिन हो, निराशा र वैराग्यका भाव मँडारिन थाल्नेछन् । मनमा कुनै दुविधा भएमा आमा वा घरकी बुजुर्ग महिलाको विचारको अनुसरण गरेको राम्रो हुन्छ ।
शुभरङ्ग : सेतो वा घुर्मैलो
शुभअङ्क : ६
शुभदिशा : दक्षिण
इष्टदेवता : विष्णु भगवान्
अशुभ रङ्ग : सुन्तले/गुलाबी
अशुभ अङ्क : १
अशुभ दिशा : पूर्व
कार्यसिद्धि मन्त्र : ॐ धन्वन्तरीदेवाय नमः
न्यूनतम जापसङ्ख्या : ०८
के गर्ने : कुरा काट्ने र प्रतिद्वन्द्वीसित सतर्क रहने
के नगर्ने : मुद्दामामिला र झैझगडा
कन्या (टो, प, पि, पु, ष, ण, ठ, पे, पो) –
आजबाट पारिवारिक वातावरणमा सुधार आउने छ । घरपरिवारमा खुसीको वातावरण छाउने छ । बन्धुवान्धव र छर–छिमेकीले सहयोग पुर्याउने छन् । प्रतिस्पर्धाबाट फाइदा उठाउन सकिने छ । वैदेशिक क्षेत्रबाट लाभ लिने मौका छ । इष्टमित्र र नातेदारका माझमा सुमधुर सम्बन्ध कायम हुनेछ । बेलुकीपख दार्शनिक र आध्यात्मिक विषयवस्तुको आकर्षण बढ्ने देखिन्छ । आज पाँचौं भावमा चन्द्रमाको प्रवेश हुँदैछ, खासगरी ज्ञान, बुद्धि र विवेकलाई प्रयोग गर्नेहरूले लाभ र श्रेय पाउने समय हो । लेखन, प्रकाशन र ज्ञानगुनका क्षेत्रमा सक्रियता बढ्ने छ । समाजमा तपाईंको बुद्धिको प्रशंसा हुनेछ । पैसाको मामिलामा खासै फरक पर्ने दिन देखिंदैन ।
शुभरङ्ग : आकासे
शुभअङ्क : ९
शुभदिशा : पूर्व
इष्टदेवता : सरस्वती माता
अशुभ रङ्ग : कालो
अशुभ अङ्क : ३
अशुभ दिशा : उत्तर
कार्यसिद्धि मन्त्र : ॐ वाग्देव्यै नमः
न्यूनतम जापसङ्ख्या : ०७
के गर्ने : आध्यात्मिक वा दार्शनिक विषयको ज्ञान लिने
के नगर्ने : अहङ्कार
तुला (र, रि, रु, रे, रो, ता, ति, तु, ते) –
राम्रो/नराम्रो दुबैखाले समाचार सुन्न पाउनु हुनेछ । यात्राको सम्भावना छ । बिहान सामाजिक र परोपकारका क्षेत्रमा खट्दा मनमा आनन्दको अनुभूति हुनेछ । दिउँसोबाट पारिवारिक र घरायसी प्रयोजनमा समय दिनुपर्ने दिन छ । खर्च बढे पनि घरायसी सुखसुविधाका सामाग्रीको जोहो हुनेछ । बन्दव्यापारबाट सामान्यतया लाभ नै लिन सकिने समय छ । प्रेमसम्बन्धमा सुधार आउने छ । बेलुका चौथो घरमा चन्द्रमा जाने भएकाले घरपरिवारभित्रका कुनै पुराना समस्या हल गर्ने परिस्थिति बन्नेछ । तपाईं परदेशमा हुनुहुन्छ भने आमा वा घरको सम्झनामा रुमल्लिन बेर लगाउनु हुन्न । आन्तरिक सम्पत्तिको व्यवस्थापनका लागि समय दिनुपर्ने हुनसक्छ ।
शुभरङ्ग : कलेजी
शुभअङ्क : ४
शुभदिशा : उत्तर
इष्टदेवता : अष्टमातृका
अशुभ रङ्ग : गाढा नीलो
अशुभ अङ्क : २
अशुभ दिशा : पश्चिम
कार्यसिद्धि मन्त्र : ॐ अष्टमातृकाभ्यो नमः
न्यूनतम जापसङ्ख्या : ११
के गर्ने : आमाको वा बृद्ध स्त्रीको आशीर्वाद ग्रहण गर्ने
के नगर्ने : लोभ र मोह
बृश्चिक (तो, ना, नि, नु, ने, नो, या, यि, यु) –
धनस्थानमा रहेको चन्द्रमा पराक्रम स्थानमा प्रवेश गर्ने उत्तम समयको आगमन भएको छ । आज धार्मिक र सामाजिक काममा वा नातागोताको सरसहयोगमा समय बित्ने सम्भावना देखिंदैछ । बन्द व्यापार र कृषिक्षेत्रमा मध्यमफल प्राप्त हुनेछ । धनागमका दृष्टिले आजको दिन सामान्यतया ठिकैको दिन रहने छ, तर व्यवहारिक कठिनाइको सामना गर्नु पर्ला । आहारविहार र खानपानको समय बदलिन सक्छ । बोलीमा खासै प्रभाव नरहने दिन भएकाले मानप्रतिष्ठा र सामाजिक मर्यादाप्रति सचेत रहनु होला, तपाईंको भावनाको कदर नहुनसक्छ । मनमा वैराग्यको भावना पलाउन सक्छ र आध्यात्मिक र दार्शनिक भावनाको विकास हुनेछ ।
शुभरङ्ग : हरियो
शुभअङ्क : ३
शुभदिशा : पश्चिम
इष्टदेवता : गणेश
अशुभ रङ्ग : गुलाबी वा सिन्दूरे
अशुभ अङ्क : १
अशुभ दिशा : दक्षिण
कार्यसिद्धि मन्त्र : ॐ कार्यविनायकाय महागणाधिपतये नमः
न्यूनतम जापसङ्ख्या : ०८
के गर्ने : परोपकारी र सामाजिक काममा मन दिने
के नगर्ने : दुःखीको अपमान
धनु (ये, यो, भ, भि, भु, ध, फा, ढ, भे) –
चन्द्रमाले धनस्थानको यात्रा प्रारम्भ गर्ने दिन भएकाले तपाईंले अहिले हौसिइहाल्ने समय आएको छैन । नयाँ काममा हात हाल्नु बलियो समय छैन । आर्थिक तनावको समय भए पनि बेफाइदा नै हुने दिन छैन, प्रयास गरेमा कुनै न कुनै क्षेत्रबाट धेरथोर आम्दानी बढाउन सकिने समय छ, तर सामाजिक र पारिवारिक सम्बन्धमा चिसोपन देखिन सक्छ । मन भावुक र उत्ताउलो बन्नेछ । आज गरेको लेनदेनको कारोबार त्यति उपयुक्त हुने छैन, त्यसैले जे गरे पनि छिट्टै प्रतिफल आउने क्षेत्रमा लगानी गर्नु राम्रो हुनेछ । नयाँ मित्रले धोका दिन सक्छ । बोलीमा उत्ताउलोपन हुने भएकाले संयमता अपनाउनु राम्रो हुन्छ । चिसो चिजबिज खानपान नगर्नु बेस हुनेछ ।
शुभरङ्ग : सेतो
शुभअङ्क : २
शुभदिशा : दक्षिण
इष्टदेवता : लक्ष्मी माता
अशुभ रङ्ग : पहेंलो
अशुभ अङ्क : ९
अशुभ दिशा : पूर्व
कार्यसिद्धि मन्त्र : ॐ सिद्धिलक्ष्म्यै नमः
न्यूनतम जापसङ्ख्या : ११
के गर्ने : चेलीबेटी र कुटुम्बसँग नम्र व्यवहार गर्ने
के नगर्ने : फजुल खर्च
मकर (भो, ज, जि, खि, खु, खे, खो, गा, गि) –
दिनको सुरुवातमा बाह्रौं भावमा चन्द्रमाको उपस्थिति भए पनि शुभ परिणाम नै प्राप्त हुने दिन छ, दिउँसो तपाईंको आफ्नै घरमा चन्द्रमा आइपुग्छ, त्यसैले कुनै महत्त्वपूर्ण निर्णय लिनु छ वा यात्राको योजना छ भने मध्याह्नपछि मात्र राम्रो हुनेछ । दिनको सुरुवातमा साथीभाइ र घरपरिवारबाट सोचेको सहयोग प्राप्त हुँदैन । स्फूर्ति र उमङ्गको कमी हुनेछ तर अपराह्नतिर विलासिता र रमणीयतातर्फ मन आकर्षित हुनेछ । प्रारम्भमा मनमा दोधार भए पनि अन्त्यमा उत्साह र उमङ्गमा कमी हुने छैन, जोस र जाँगर बढ्ने दिन छ, महत्त्वाकाङ्क्षा त्यागी अघि बढेमा लाभ मिल्ने समय छ । बन्दव्यापारमा देखिएको मन्दी आजबाट क्रमशः हट्दै जाने वातावरण बन्नेछ ।
शुभरङ्ग : गुलाबी
शुभअङ्क : १
शुभदिशा : पूर्व
इष्टदेवता : हनुमान्
अशुभ रङ्ग : हरियो
अशुभ अङ्क : ८
अशुभ दिशा : उत्तर
कार्यसिद्धि मन्त्र : ॐ अं अङ्गारकाय नमः
न्यूनतम जापसङ्ख्या : १०
के गर्ने : नैराश्यभाव त्याग गर्ने
के नगर्ने : कल्पनामा र भावनामा डुब्ने काम
कुम्भ (गु, गे, गो, सा, सि, सु, से, सो, द) –
सुरुमा राज्यस्थानमा रहेको चन्द्रमाका कारण पठनपाठन र प्राज्ञिक क्षेत्रबाट लाभ लिन सकिने छ । सन्तान पक्षबाट सहयोग प्राप्त हुनेछ । पशुपालन र कृषिव्यवसायमा सफलता प्राप्ति हुनेछ । तर्क, वहस र वादविवादमा विजय प्राप्त हुनेछ । धार्मिक गतिविधि, दर्शन र अध्यात्मतर्फ लाग्न प्रेरणा प्राप्त हुनेछ । कुनै सरकारी काम भए दिनभरिमा सिध्याउनु राम्रो हुन्छ । अपराह्नपछि द्वादश चन्द्र हुनाले पेसा वा बन्दव्यापारमा ध्यानकेन्द्रित हुँदैन, खर्च गर्न मन हौसिने छ । वैराग्य र निराशाका भावना सञ्चरण हुनसक्छन् । अभिभावक वा ठूलाबडासँग बेकारका कुरामा बहस गर्नुपर्ने हुनसक्छ । तर दूरदराजको क्षेत्र वा विदेशबाट शुभ समाचार प्राप्त हुनेछन् ।
शुभरङ्ग : बैजनी वा पहेंलो
शुभअङ्क : ४
शुभदिशा : उत्तर
इष्टदेवता : कुल/पितृदेवता
अशुभ रङ्ग : हरियो/चम्किलो
अशुभ अङ्क : ७
अशुभ दिशा : पश्चिम
कार्यसिद्धि मन्त्र : ॐ बृं बृहस्पतये नमः
न्यूनतम जापसङ्ख्या : १९
के गर्ने : खर्र्चमा नियन्त्रण
के नगर्ने : विलम्ब र ढिलासुस्ती
मीन (दि, दु, थ, झ, ञ, दे, दो, च, चि) –
कामधन्दा र मिहिनेतबाट सामान्यतया लाभ हुने नै समय रहेको छ । कर्मक्षेत्रमा रहेको चन्द्रमाको आज लाभस्थानमा प्रवशे हुने भएकाले उद्योगधन्दा, बन्दव्यापार वा रोजगारीको क्षेत्रबाट कुनै शुभ संकेत प्राप्त हुने सम्भावना देखिंदैछ । कुनै नयाँ काम गर्ने मनसायमा हुनुहुन्छ भने चियोचर्चो गर्ने, कुरा काट्ने र खुट्टा तान्नेको गतिविधिमाथि निगरानी गर्नु होला, नत्र हुनै लागेको काममा विघ्न उपस्थित हुनसक्छ । यद्यपि इष्टमित्र र सहयोगीहरूको साथ मिल्नेछ । व्यापारबाट सोचेजस्तो लाभ त मिल्दैन, तर बेफाइदा छैन । आफ्नो साख रहने समय छ । ठूलाबडाले सहयोग गरेमा राज्यपक्ष र प्रशासनिक काममा सफलता पाउन सकिन्छ । मुद्दामामिला र झैझगडाबाट टाढा रहनु राम्रो हुन्छ ।
शुभरङ्ग : नीलो
शुभअङ्क : ३
शुभदिशा : पश्चिम
इष्टदेवता : शिवजी
अशुभ रङ्ग : घिउरङ्ग/क्रिम
अशुभ अङ्क : ६
अशुभ दिशा : दक्षिण
कार्यसिद्धि मन्त्र : ॐ सूर्यसुताय शनये नमः
न्यूनतम जापसङ्ख्या : २३
के गर्ने : बन्दव्यापार र लाभमूलक काममा लगानी
के नगर्ने : अनुशासन भङ्ग
