ड्यालस (टेक्सस)— प्रवासी नेपाली मञ्चको आउँदो महिना बाल्टिमोरमा हुने अधिवेशनका लागि टेक्ससबाट ३६ जनाले सहभागिता जनाउने भएका छन् । आइतबार टेक्ससको ड्यालसमा भएको भेलाले २३ जना प्रतिनिधि छनौट गरेको छ । साधारण सभामा प्रवासी नेपाली मञ्च केन्द्रिय समितिमा रहेका टेक्ससका १३ जना पदेन प्रतिनिधिको रुपमा सहभागी हुन पाउँछन् ।
आइतबारको भेलाले प्रवासी नेपाली मञ्च टेक्सस राज्य कमिटीका सभापति देवीप्रसाद पाण्डे (दीपक) को नेतृत्वमा २३ प्रतिनिधि छनौट गरेको हो । छनौट भएका प्रतिनिधिहरुमा मणी भण्डारी, जीबराम बुढा, निरज तिम्सिना, चन्द्रमणि पाण्डे, युवराज खनाल, लक्ष्मण घिमिरे, उत्तम खड्का, नारायण अधिकारी, नारायण खड्का, सुशील क्षेत्री, दिवस थापा छनौट भएका छन् ।
त्यस्तै अन्य प्रतिनिधिहरुमा गोपाल प्याकुरेल, हेम पाठक, सरिता पाठक, नन्दी भट्टराई, विजयराज भट्टराई, नेत्र पाण्डे, चन्द्रा चुडाल, नर्वदा राणा, रेशम जिसी, सरिता चौलागाई र भुवन अधिकारी चयन भएका छन् ।
अधिवेशनमा टेक्ससबाट केन्द्रिय समितिमा रहेका कमल ओझा, यमुना भट्टराई, अग्नी सञ्जेल, जीवन जोशी, जनक राना, प्रदीप तिम्सिना, गोकर्ण दाहाल पदेन प्रतिनिधि रहेका छन् । त्यस्तै कृष्ण भण्डारी, नन्द रेग्मी, चेतनाथ भट्टराई, राजु शर्मा, भीम कार्की र सिपी रेग्मी पनि पदेन केन्द्रिय प्रतिनिधिका रुपमा सहभागी हुनेछन् ।
‘आज हामीले असाध्यै सौहाद्रपूर्ण रुपमा दोस्रो केन्द्रिय अधिवेशनका लागि प्रतिनिधि छनौट गरेका छौँ,’ टेक्सस राज्य समितिका सभापति देबी पाण्डेले भने । पाँच सदस्य बराबर एक केन्द्रिय प्रतिनिधि छनौट हुने विधानतः व्यवस्था भए अनुसार ती प्रतिनिधिहरु छनौट भएका हुन् । आइतबार टेक्सस लगायत अमेरिकाका १९ राज्यहरुबाट मञ्चको अधिवेशनका लागि प्रतिनिधिहरु छनौट गरिएको छ ।
न्युयोर्क, बाल्टिमोर, भर्जिनिया, न्यूहेप्सार, बोष्टन, न्यूजर्सी, केन्टुकि, ईन्डियाना, साउथ क्यारोलाइना, नर्थ क्यारोलाइना, मिनिसोटा, आईवा, ओक्लोहामा, मिसिसिपी, टेक्सास, कोलोराडो, वासिंगटन र क्यालिफोर्नियामा प्रतिनिधि छनौट कार्यक्रम सम्पन्न भएको हो । मञ्चका महासचिव प्रभु थापाले चयन भएका प्रतिनिधिहरूमा वधाइ ज्ञापन गरेका छन् ।
मञ्चको अधिवेशनले नयाँ नेतृत्व चयन गर्ने कार्यक्रम रहेको छ । अहिलेसम्म वर्तमान महासचिव प्रभु थापा, टेक्ससबाट भीम कार्की, जनक राणा, प्रितीसागर खत्री, टेक गुरूंग र शंकरराज पन्तले अध्यक्षको चाहना व्यक्त गरेका छन् ।
यसपटक हामी सर्वसम्मत गरेर टेक्ससमै नेतृत्व ल्याउने योजनामा छैँ, टेक्ससबाट प्रतिनिधि चयन भएका सुशील क्षेत्रीले भने । मञ्चको अधिवेशनमा प्रमुख अतिथिका रूपमा पूर्व प्रधानमन्त्री तथा एमालेका अध्यक्ष केपी शर्मा ओली अमेरिका आउँदैछन् ।
