डोटीको कालागाढबाट मुडभरातर्फ जाँदै गरेको ग१ज ५२७५ नम्बरको जिप डोटीकै शिखर नगरपालिका–३, छाइपानीमा शनिबार दिउँसो दुर्घटना हुँदा चारजनाको घटनास्थलमै मृत्यु भएको छ ।
स्थानीय खडकबहादुर जोराले घटनास्थलबाट दिएको जानकारीअनुसार मृत्यु हुनेमा शिखर नगरपालिका–३, जोरागाउँका १४ वर्षीय सुरेश भुल, सोही ठाउँकी ४० वर्षीया खिन्तुरी भुल र सोही ठाउँकी ३२ वर्षीया कटी सार्की रहेका छन् । मृतक एकजनाको सनाखत हुन सकेको छैन ।
दुर्घटनामा परेर अरु १६ जनाभन्दा बढी घाइते छन् ।
घाइतेहरुको सुजुङ सामुदायिक अस्पताल, राजपुरमा उपचार भइरहेको जिल्ला प्रहरी कार्यालय डोटीका प्रवक्ता डीएसपी शिवबहादुर सिंहले जानकारी दिए ।
स्थानीयकाअनुसार जिप सडकबाट करिब ५० मिटर तल खसेको छ । घटनास्थल डोटी सदरमुकामबाट करिब २५ किलोमिटर टाढा पर्छ ।
घाइतेहरुको स्थानीय र प्रहरीले उद्धार गरेका थिए ।
