नेपाली कांग्रेसका उपसभापति विमलेन्द्र निधिले मेरिल्याण्ड पशुपति–बुद्ध मन्दिरलाई जनकपुरधामस्थित प्रसिद्ध जानकी मन्दिर जस्तै जानकी माताको मूर्ति दिने भएका छन् । यसका लागि निधिले पहल गर्ने प्रतिबद्धता जाहेर गरेका छन् ।
पूर्वमन्त्री समेत रहेका निधिले नेपाल शिक्षा तथा सांस्कृतिक केन्द्रस्थित पशुपति–बुद्ध मन्दिरको भ्रमणमा उक्त प्रतिबद्धता जाहेर गरेका हुन् । कांग्रेस नेता निधि निजी भ्रमणका लागि आफ्नी पत्नीसहित अमेरिका आएका छन् ।
मन्दिर अवलोकन गराउन एसोसिएसन अफ नेपाली तराईएन इन अमेरिका (एन्टा)का वर्तमान अध्यक्ष विजय सिंहले समेत पहल गरेका थिए । निधिले भ्रमण कै क्रममा मन्दिरका पदाधिकारी तथा अन्य नेपाली समुदायसंग भेटघाट गरेका छन् ।
निधिले पूजा समाप्त गरेपछि भेटघाट कै क्रममा मन्दिरलाई थप जनकपुरधाम जस्तै जानकी माताको मूर्ति स्थापना गर्न पहल गर्ने बताए ।
