नेपाल सियाटल सोसाइटी लगायत वासिङटन राज्यमा रहेका नेपाली संघ संस्थाका प्रतिनिधिको उपस्थितमा नेपाल अमेरिका पत्रकार संघ नेजाले जुलाई २१ र २२ मा हुने अधिवेशनको तयारी मिटिङ आइतबार सियाटलमा आयोजना गरेको छ ।
गोरखा दरबारमा आयोजित कार्यक्रममा स्थानीय संघ संस्थाका प्रतिनिधिहरूले सियाटलमा गर्न लागिएको नेजाको छैटौँ अधिवेशन तथा १२ औँ साधारण सभाको स्वागत गरेका छन् ।
नेपाल सियाटल सोसाइटीका संस्थापक अध्यक्ष एवं वासिङ्टन स्टेटका आयुक्त मोहन गुरुङ, वाणिज्यदुत एसी शेर्पा, नेपाल सियाटल सोसाइटीका अध्यक्ष माधव भण्डारीले अधिवेशन सफल बनाउन सहयोग गर्ने प्रतिबद्धता जनाए । कार्यक्रममा दशरथ वुढाथोकी, बुद्धि कुँवर, पशुपति पाण्डे, पूर्व अध्यक्ष गणेश शिवाकोटी, मनिष ढकाल, हुने गुरुङले कार्यक्रम तयारीका लागि आवश्यक सहयोग गर्ने बताए ।
विभिन्न सहरमा रहेका नेपाली समुदायसँग नेजालाई जोड्दै जाने पूर्व घोषित नीति अनुसार नेजाले सियाटलमा अधिवेशन गर्न लागेको अधिवेशन तयारी समितिका संयोजक ध्रुव कुँवरले जानकारी दिए ।
कार्यक्रममा नेजाका महासचिव तोया दाहाल, कोषाध्यक्ष शैलेश पोखरेलले संस्थाले नेपाली समुदायसँग जोडिएर गरिरहेका काम र उद्देश्य प्रष्ट पारे ।
