म्याग्दीको बेनीमा ड्राइभिङ सिक्नका लागि प्रयोग गरिएको ट्याक्सी नदीमा खस्दा दुई बेपत्ता भएका छन्।
बेनीस्थित जिल्ला प्रहरी कार्यालयको पछाडिको बहुद्देश्यीय खेल मैदानबाट ध १ ज २५१ नं को ट्याक्सी म्याग्दी नदीमा खस्दा जलजला गाउँपालिका बगरफाँटकी ३० वर्षीया शोभा अधिकारी खाती र उनका ८ वर्षीय छोरा सागर बेपत्ता भएको प्रहरीले जनाएको छ।
अधिकारीले छोरालाई सँगै राखेर ट्याक्सी सिक्ने क्रममा खेल मैदानको डिलबाट नदीमा खसेर बेपत्ता भएको प्रहरी नायब उपरीक्षक वीरबहादुर बुढामगरले बताए। बेपत्ता ट्याक्सी र अधिकारी आमाछोराको खोजीमा प्रहरी तथा स्थानीय बासिन्दा परिचालन भए पनि अझै भेटिएका छैनन्।
नदीले बगाएको ट्याक्सी बेनी ड्राइभिङ इन्स्टिच्युटको हो। इन्स्टिच्युका सञ्चालकलाई नियन्त्रणमा लिएर अनुसन्धान सुरु गरिएको प्रहरीले जनाएको छ।
