१९ दिनदेखि आमरण अनसनमा बसेका डा. गोविन्द केसीका मागमा ऐक्यबद्धता जनाउँदै सरकारी चिकित्सकहरुले शुक्रबार देशभरका सरकारी अस्पतालमा आकस्मिकबाहेकका सेवा बहिस्कार गरेका छन् ।
केसीले उठाएका माग सम्बोधनका लागि दबाव दिँदै सरकारी चिकित्सक संघ (गोडान)को आह्वानमा चिकित्सकहरुले सरकारी अस्पतालमा आकस्मिक बाहेकका सेवा ठप्प पारेका हुन् । संघले बाध्य भएर सेवा बहिस्कार गर्नुपरेकाले यसबाट पुग्ने असुविधाप्रति सरकार नै जिम्मेवार हुनुपर्ने पनि जनाएको छ ।
तर अस्पतालमा हुने बिरामीको चाप र भर्ना भएर बसेका बिरामीको उपचार तथा सहयोगका लागि अस्पताल परिसरमा आवश्यक पूर्वाधार जुटाएर ओपिडी सेवा उपलब्ध गराएको संघले जनाएको छ ।
सरकारी चिकित्सकहरुले सेवा बहिस्कार गरेपछि बिरामीलाई समस्या भएको छ । उपचारका लागि अस्पतालमा पुगेका बिरामी सेवा नपाएर निजी अस्पतालतर्फ लागेका छन् ।
यसैबीच सरकारी वार्ता टोली र डा. केसीका प्रतिनिधिबीच पाँच दिनयता वार्ता हुन सकेको छैन । त्रिवि शिक्षण अस्पताल महाराजगन्जमा १९ दिनदेखि अनसनरत डा. केसीको स्वास्थ्य अवस्था भने जटिल बन्दै गएको छ ।
उनको शारीरिक अवस्था निकै कमजोर बन्दै गएको उपचारमा संलग्न चिकित्सकहरुले बताएका छन् ।
