नेपाली समाज टेक्ससको आइतबार भएको साधारण सभाले ६५ वर्ष उमेर पुगेकाहरुलाई सदस्यता शुल्कमा छुट दिने निर्णय पारित गरेको छ ।
साधारण सभाले ६५ वर्ष उमेर पुगेकाहरुलाई सदस्यता शुल्कमा आधा छुट दिने निर्णय गरेको हो । सदस्यता शुल्क बार्षिक १० डलर (दुई वर्षको २० डलर) रहेकोमा त्यसमा छुट दिएर बार्षिक ५ डलर (दुई वर्षको १० डलर) मात्र लिने निर्णय पारित गरेको छ ।
समाजका अध्यक्ष कृष्ण लामिछानेको सभापतित्वमा भएको साधारण सभाले आजीवन सदस्यताको शुल्क पनि घटाएको छ । आजीवन सदस्यता शुल्क पाँचसय डलर रहेकोमा त्यसलाई घटाएर एकसय ५० डलरमात्र कायम गरिएको छ ।
त्यस्तो आउँदो डिसेम्बरमा हुने संस्थाको निर्वाचन सम्पन्न गर्नका लागि पूर्ब अध्यक्ष बैकुण्ठ थापाको संयोजकत्वमा निर्वाचन समिति समेत गरेको छ । समितिमा पूर्ब अध्यक्ष डा. प्रेम अधिकारी, पूर्ब उपाध्यक्ष निरज श्रेष्ठ, महेन्द्र पौडेल र विनोद योगी सदस्य रहेका छन् ।
नेपाली समाजको विधान अनुसार आउँदो डिसेम्बरभित्र निर्वाचन गरेर नयाँ नेतृत्व चयन गरिसक्नुपर्ने प्रावधान छ । अध्यक्ष कृष्ण लामिछानेले डिसेम्बर दोस्रो या तेस्रो हप्ताभित्र निर्वाचन हुने जानकारी दिए।
साधारण सभाले संस्थाको कार्यसमितिमा आइटी कोअर्डिनेटर, स्कूल कोआर्डिनेटर र हेल्थक्याम्प कोअर्डिनेटरको मनोनयन कार्यसमितिले गर्न पाउनेगरि विधानमा परिमार्जन गरेको छ ।
साधारण सभाले महासचिव कमल सत्याल र कोषाध्यक्ष दीवस थापाद्वारा प्रस्तुत प्रतिवेदन पारित गरेको छ । प्रतिवेदनमा वर्तमान कार्यसमिति निर्वाचित भएर आएदेखिका २२ महिनामा भएका विवरणहरु प्रस्तुत गरिएको थियो ।
महासचिव सत्यालले दुई वर्षको कार्यकालमा संस्थाले गरेका ८६ वटा कार्यक्रमका बारेमा चर्चा गरेका थिए ।
कोषाध्यक्षको प्रतिवेदनमा सन् २०१६ मा बिभिन्न शिर्षकबाट एकलाख ७६ हजार डलर आम्दानी भएको र एकलाख ६७ हजार खर्च भएर ८ हजार ८ सय वचत भएको उल्लेख छ । त्यस्तै सन् २०१७ को जनवरीदेखि हालसम्म एकलाख ९ हजार आम्दानी तथा एकलाख ८ हजार खर्च भएर एकजार तीनसय डलर वचत रहेको प्रतिवेदनमा उल्लेख छ ।
साधारण सभामा अध्यक्ष लामिछानेले आफ्नो कार्यकालमा थालिएका कार्यहरुलाई सफल बनाउन सहयोग गरेकोमा साधारण सदस्यहरु प्रति आभार प्रकट गरेका थिए ।
त्यस अवसरमा समाजका पूर्ब महासचिव विजयराज भट्टराईले दुई वर्ष अघिको निर्वाचनमा आपूm अध्यक्षमा पराजित भएपनि कृयाशीलता र संस्थाको गतिशिलताका लागि कहिल्यै पनि पछि नपरेको उल्लेख गरे । भट्टराईले आवश्यकता ठानिएको, सल्लाह सुझाव मागिएका ठाउँमा पहिले जस्तै सकृयता निर्वाह गरिरहेको बताए ।
‘संस्थाले मर्दा र पर्दा घनीभूत रुपमा सहयोग गरेको छ । तर विगतमा छरिएको समाज जुट्दै गएको थियो, अहिले त्यो जुटेको समाज फेरि छरपष्ट भएको जस्तो महसुस भएको छ,’ भट्टराईले भने ।
कार्यक्रममा समाजसेवी डा. मुरल अधिकारी, नेपाली समाजका संस्थापक महासचिव सुन्दर कर्माचार्य, विनय अर्याल, सुरेशचन्द्र पोखरेल लगायतले विधान लगायत संस्थागत विषयमा बिभिन्न सुझावहरु दिएका थिए ।
