काठमाडौं, असोज ११ । स्वदेशमा मात्र होइन विदेशमा रहेका नेपालीहरुलाई महान पर्व बडादशैंले ब्यस्त बनाउन थालेको छ ।
पेल्सिभेनियाको स्क्र्यान्टनको भूटानी शरणार्थी बस्तीमा रहेका शर्मा भुटानबाट लखेटिएर झापाका विभिन्न शिविरबाट अमेरिका पुर्नवास भएका सयौं भुटानी आप्रबासी र नेपालीहरु मिलेर भब्य दुर्गापुजाको तयारी भइरहेको बताउँछन् । ‘भुटानी शरणार्थी जीवन विताएर यहाँ आएका करिब ६ सय नेपालीहरुले यो दुर्गापुजाको आयोजना गरेका छन्, उनले भने,‘बाक्लै नेपाली बस्ती भएकाले दशैंको उल्लास छाएको छ ।’
स्क्रान्टनमा मात्र होइन ह्यारिसबर्गमा पनि दुर्गापुजाको भब्य तयारी भइरहेको छ । भुटानी अमेरिकी हिन्दु समाजले दशैं विशेष प्रवचनसहित लुइभेलमा तीनदिने दुर्गापुजाको भब्य तयारी गरेको छ । पेल्सिभेनियाको पिटर्सवर्कमा हिमालयन इभेन्ट एन्ड म्यानेजमेन्टले ‘सुर साँझ’ सांगीतिक कार्यक्रमको तयारी गरिरहेको छ ।
सन् १९९० मा भुटानबाट लखेटिएर झापा र मोरङका शरणार्थी शिविरको छाप्रोमा दशैं मनाएका करिब ९० हजार भुटानी शरणार्थी अमेरिकामा छन् । तेस्रो मुलुक पुर्नस्थापना कार्यक्रमअन्तरगत शरणर्थीलाई अमेरिका, अस्ट्रेलिया, बेलायत, क्यानाडा, डेनमार्क, नर्वे, न्युजिल्यान्ड, नेदरल्यान्ड्स लगायतका मुलुकमा बस्ने ब्यवस्था मिलाइएको छ । मेरिल्याण्ड, बाल्टीमोर, क्यासस, नर्थ क्यालोरिना, सिकागो, जर्जिया, ओहायो, वासिङटन डिसीलगायत २० राज्यमा भुटानी आप्रबासी छन् ।
कतिपय शरणार्थीका परिवारका सदस्यहरु एकैपटक अमेरिका पुर्नबास नभएपछि दशैं खल्लो हुने गरेको छ । परिवार तितरवितर बनेपछि चाडबाडमा खुशीयाली नआउने गरेको बताउँछन् । छाप्रोमा दशैंको बेग्लै रौनक हुने गरे पनि अमेरिकाको महलमा कतिपयको दशैं खल्लो हुने गरेको छ । यद्यपी, चिटिक्क परेका सुविधासम्पन्न घरमा बसेका भुटानी आप्रबासीहरु यसबर्षको दशैंलाई उल्लासमय बनाउने अभियानमा छन् ।
सांगीतिक कार्यक्रम, जमघट, दुर्गापुजा, नाचगान गरेर दशैं मनाउने सुरमा छन् । स्क्र्यान्टनमा रहेकी ६२ बर्षीया पूर्णमाया बाँनियाले टेलिफोनमा भनिन, ‘भुटानमा छँदाको दशैं त अब कहिल्यै नआउला तर शिविरमा पनि चाडबाडको बेग्लै मजा थियो अहिले अमेरिकामा पनि खुशीयालीमै दशैं मनाउने तयारी गरिरहेका छौं,’ उनले भनिन,– ‘नेपालीहरु धेरै संख्यामा भएकाले खिन्नता हुँदैन तर नेपालमा जस्तो हप्तादिनसम्म दशैं मनाउन पाइदैन ।’
साँगुरो र कच्ची छाप्रोमा बर्षौ गुजारेका भुटानीहरु सन् २००८ पछिका बर्षहरुमा विदेशका सुविधा सम्पन्न घरमा बसेर दशैं मनाइरहेका छन् । ढाका टोपी, दौरा-सुरुवाल, गुन्यू-साडीमा सजिएर आफन्त र छिमेकीहरुसँग दशैं मनाउँदा नेपालमै भएको अनुभुती हुने गरेको अमेरिका स्क्रयान्टनमा रहेकी सुजाता शर्माले बताइन् ।
