नेपाल अमेरिका पत्रकार संघ नेजाको १२ औँ साधारणसभा तथा अधिवेशनमा सहभागी हुनका लागि मे ३१, २०१८ सम्म सदस्यता नवीकरण गरिसक्नुपर्ने भएको छ । साथै नयाँ सदस्यताको लागि निवेदन पेस गरिसक्नुपर्ने समय मे ३१ लाई निर्धारण गरेको गरिएको छ ।
नेजाको कार्यसमिति बैठकले १२ औँ साधारणसभा तथा अधिवेशन जुलाई २१, २०१८ शनिवार र जुलाई २२, २०१८ आइतबार हुने निर्णय गरेको छ । १२ औँ साधारणसभा तथा अधिवेशन सम्पन्न गर्नको लागि पश्चिम क्षेत्रीय संयोजक ध्रुव कुँवरलाइ कन्भेनर, सह–कन्भेनर यम घिमिरे, सदस्यमा सन्दिप बाबु चौधरी, कोषाध्यक्ष शैलेश पोखरेल रहने र समितिले आबस्यकता अनुसार सम्मेलन सम्पन्न गर्नको लागि तयारी समितिमा थप सदस्यहरू राखि कार्य गर्नसक्ने जिम्मेवारी प्रदान गरेको छ ।
नेजाको नयाँ कार्यसमिति छनौटका लागि विधानको धारा १२.१ बमोजिम सल्लाहाकार तारा बरालको संयोजकत्वमा गिरिश पोखरेल, योगेश उपाध्याय, आंग छिरिंग शेर्पा र एक सदस्य समितिले नै थप गर्ने गरि पाँच सदस्यीय निर्वाचन समिति बनाएको छ ।
नेजा अधिवेशनको समयमा प्रदान गरिँदै आएको ‘नेजा सामुदायिक ग्रामीण पत्रकारिता पुरस्कार’ छनौटको लागि पूर्व अध्यक्ष आंग छिरिंग शेर्पाको संयोजकत्वमा पुरस्कार छनौट समिति बनाउने र संयोजकले थप सदस्य मनोनयन गरी पूर्णता दिई नेपाल पत्रकार महासंघसंग समन्वय गर्दै विजेताको नाम कार्यसमितिमा सिफारिस गर्नको लागि जिम्मेवारी दिएको छ ।
नेजा अधिवेशन तथा साधारणसभाको समयमा प्रकाशन गरिँदै आएको ‘प्रयास’ प्रकाशनको लागि सचिव अग्नि चौलागाईलाई जिम्मेवारी दिने तथा उनले आवश्यकता अनुसार सदस्य थप गरी कार्य गर्न दिने निर्णय गरिएको छ ।
