अमेरिकाको न्युयोर्क शहरमा एक महिलालाई स्ट्याच्यु अफ लिबर्टीमा चढ्न खोजेको आरोपमा पक्राउ गरिएको छ । राष्ट्रपति डोनल्ड ट्रम्पले आप्रवासीविरुद्ध शून्य सहनशीलता नीति ल्याएपछि त्यसको विरोधमा महिलाले यस्तो काम गरेकी हुन् ।
ट्रम्पको नीतिअन्तर्गत मेक्सिको सीमामा प्रवासी आमाबुवालाई उनीहरूका सन्तानबाट अलग गरिँदैछ । सीएनएनका अनुसार, स्ट्याच्यु अफ लिबर्टीमा चढेकी महिलासँग ट्रम्प प्रशासनले कुराकानी गर्ने कोशिश गरेको छ ।
ती महिला प्याट्रिसिया ओकोउमू हुन् । महिलालाई तल झर्न लगाइयो तर उनी मानिनन् । तीन घन्टासम्म उनी त्यहीँ बसिरहिन् । न्युयोर्क प्रहरी विभागको सूत्रले बताएअनुसार, प्याट्रिसिया ट्रम्प नीतिको विरोध गर्ने समूहको एक सदस्य हुन् ।
बच्चाहरूलाई हिरासत केन्द्रबाट रिहा नगरिएसम्म आफू त्यहीँ बस्ने धम्की उनले दिएकी थिइन् ।
प्रहरी अधिकारी ब्रायन ग्लेकेनले बुधवार साँझ बताएअनुसार, न्युयोर्क प्रहरी विभागले १६ अधिकारीको मद्दतमा महिलालाई तल झारेका हुन् ।
यी महिला आफैं एक आप्रवासी हुन् र केही वर्षअघि उनी कंगोबाट अमेरिका पुगेकी हुन् ।
ट्रम्पको नीतिको अमेरिकामा मात्र नभई संसारभरि विरोध भइरहेको छ ।
