अमेरिकी राष्ट्रपति डोनल्ड ट्रम्पले विदेशी नागरिकका अमेरिकामा जन्मेका सन्तानको नागरिकतासम्बन्धि अधिकार अन्त्य गर्नेबारे आफूले विचार गरिरहेको बताएका छन् ।
ट्रम्पले अवैध आप्रवासी र अस्थायी भिसा भएका आमाबुवाका सन्तानले अमेरिकामा जन्मेको आधारमा स्वतः अमेरिकी नागरिकता प्राप्त गर्ने प्रावधान आफूले अन्त्य गर्नेबारे सोचबिचार गरिरहेको उनले बताएका छन् ।
एक वेबसाइटसँगको अन्तर्वार्तामा ट्रम्पले कंग्रेसको अनुमोदनबिना नै एक कार्यकारी आदेशमार्फत यसबारे निर्णय गर्न सकिने उनका सल्लाहकारले आश्वस्त तुल्याएको बताएका छन् ।
तर राष्ट्रपतिले विधायिकाको अनुमोदनबिना आफ्नो एकल निर्णयले त्यस्तो कानुन परिवर्तन गर्न सक्छन् वा सक्दैनन् भन्ने स्पष्ट छैन ।
संविधान संशोधन मार्फत सन् १८८६ देखि कायम रहेको जन्मसिद्ध नागरिकताको अधिकारसम्बन्धी प्रावधान उल्टाउन सक्ने अधिकार राष्ट्रपतिसँग नरहेको धेरैजसो विज्ञहरूको विश्वास छ।
अमेरिकी संविधानअनुसार अमेरिकामा जन्मेका र अंगीकृत नागरिकता लिएका सबै मानिस अमेरिकी नागरिक हुन् ।
