राष्ट्रपति डोनाल्ड ट्रम्पले अमेरिकाको कनेक्टिकटस्थित गम्भीर अवस्थामा रहेका एक व्यक्तिको अन्तिम इच्छा पूरा गर्न मद्दत गरेका छन् । यसरी राष्ट्रपतिका ठूला समर्थक रहेका जे ब्यारेट नामका यी व्यक्तिलाई ‘सिस्टिक फिब्रोसिस’ नामक रोग रहेको छ र चिकित्सकहरुले उनलाई केबल ६ महिनाको समय दिएका छन् । यस्तोमा गत आइतबार अस्पताल छाडेर बहिनीको हेरचाहमा रहेका ब्यारेटले मर्नु अगाडि राष्ट्रपति ट्रम्पसँग सम्पर्क गर्ने इच्छा व्यक्त गरेका हुन् ।
उनकी बहिनीले भने आफू शतप्रतिशत विपक्षी पार्टी डेमोक्रेटको भएको बताएकी छन् । तरपनि उनले सामाजिक संजालमार्फत ब्यारेटको अन्तिम इच्छा पूरा गर्न मद्दत मागेकी हुन् । यस्तोमा साथीहरु र उनका समर्थकहरुले ह्वाइटहाउसमा इमेल पठाउँदै यसका लागि अनुरोध गरेका हुन् जसपछि मंगलबार राष्ट्रपति डोनाल्ड ट्रम्पले उनलाई फोन गरेका हुन् । यसरी आफूहरुको प्रयास सफल भएकामा उनीहरुले अत्यन्तै खुसी व्यक्त गरेका हुन् ।
ad ad ad
ट्रम्पसँगको फोनमा ब्यारेटले यस्तो भेनका हुन्, “सबै सहज असहज परिस्थितिमा मैले तपाईँलाई नै चुनेको छु । यसरी आजसम्म धेरै सुख र धेरै कठिन दिनहरु पार भइसकेका छन् तरपनि म तपाईलाई नै समर्थन गरिरहनेछु ।”
यसपछि ट्रम्पले उनी ‘च्याम्पियन’ भएको बताउँदै आफूले उनलाई एक व्यक्तिगत पत्र पठाएको जानकारी दिएका हुन् । फोन सम्पर्कका क्रममा ट्रम्पले यस्तो भनेको बताइएको छ, “तिमी मेरै प्रकारका व्यक्ति हौ । मलाई तिमीमाथि गर्व छ । म तिमीसँग फेरि कुरा गर्नेछु हुन्छ ? तिमी आफ्नो लडाईँ जारी राख । हामी दुवैले आ–आफ्नो लडाईँलाई निरन्तरता दिइरहनुपर्छ ।”
ब्यारेटका अनुसार उनलाई ट्रम्पका छोरा एरिकले पनि सम्पर्क गरेका हुन् र अमेरिकी विभागको शहर विकास क्षेत्रकी प्रमुख लाइन पेटनसँग पनि सोमबार कुरा गरेका हुन् । उनी भन्छन्, “एरिक ट्रम्पले मेरा लागि प्रार्थना गरिरहेको बताए ।”
पेटन पनि न्यु हेभनकै भएकाले उनी चाँडै नै ट्रम्पको उपहार सहित ब्यारेटलाई भेट्न जाने बताएकी हुन् ।
यसरी ब्यारेटले २००८ मा पूर्वराष्ट्रपति बाराक ओबामालाई मत दिएको भएपनि उनका नीतिहरुसँग असन्तुष्ट रहेको बताएका हुन् । र ट्रम्पको चुनाव अभियानका क्रममा मात्र उनका नीतिहरु सुनेर आफू वास्तवमा रिपब्लिकका प्रेमी भएको थाहा पाएको बताए । उनको वास्तविक इच्छा राष्ट्रपतिलाई ह्वाइटहाउसमा प्रत्यक्ष भेटेर हात मिलाउनु थियो तर केबल छोटो सम्पर्कले पनि उनलाई अत्यन्तै खुसी बनाएको बताएका छन् । यसरी आफूसँग केबल ६ महिनाको समय भएपनि २०२० मा मत खसाल्न इच्छुक रहेको ब्यारेटले बताएको टाइमले जनाएको छ ।
