काठमाडौं, भदौ १५ । प्रधानमन्त्री पुष्पकमल दाहालले स्थानीय तहको पुनर्संरचना, संविधान कार्यान्वयनलगायतका विषयमा प्रमुख दलहरुसँग छलफल गरेका छन् ।
प्रधानमन्त्री निवास बालुवाटारमा नेपाली कांग्रेस, नेकपा एमाले र नेकपा माओवादी केन्द्रका शीर्ष नेताहरुसँग प्रधानमन्त्री दाहालले छलफल गरेका हुन् । बैठकमा प्रधानमन्त्री दाहालले स्थानीय तहको पुनर्संरचना र संविधान कार्यान्वयनका विषयमा साझा धारणा बनाउन आग्रह गरे ।तर प्रमुख प्रतिपक्षी दल नेकपा एमालेले पहिले सत्तारुढ दलको स्पष्ट धारणा बनाउन माग गरेको थियो ।
बैठकमा राज्य पुनर्संरचनाका बारेमा आयोगले तयार पारेको प्रस्तावमाथि छलफल भए पनि ठोस सहमति बन्न नसकेपछि छलफल निष्कर्षविहीन भएको छ ।
बैठकमा संविधान कार्यान्वयनका विषयमा पनि सामान्य छलफल भएको थियो । बैठकमा कांग्रेसका वरिष्ठ नेता रामचन्द्र पौडेल, एमालेका कार्यवाहक अध्यक्ष वामदेव गौतम र माओवादीका नारायणकाजी श्रेष्ठलगायतका नेता सहभागी थिए । कांग्रेस सभापति शेरबहादुर देउवा र एमाले अध्यक्ष केपी शर्मा ओली भने विदेशमा भएकाले बैठकका सहभागी भएनन् ।
