तेस्रो चरणको स्थानीय तह निर्वाचन अन्तर्गत २ नम्बर प्रदेशका ८ जिल्लाका १ सय ३६ स्थानीय तहमा मतदानको समय अहिले ५ बजेबाट सकिएको छ ।
बिहान ७ बजेबाट सुरु भएको मतदान सांझ ५ बजेबाट सकिएपनि सो अगावै मतदानका लागि लाइनमा बसेकालाई भने भोट खसाल्न दिईएको सम्बन्धित जिल्लास्थित निर्वाचन कार्यालयले जनाएका छन् । छिटपुट घटनाबाहेक अधिकांश स्थानीय तहमा मतदान शान्तिपुर्ण रुपमा मतदान भएको हाम्रा सहकर्मीले जनाएका छन् ।
प्रदेश नम्बर २ का सप्तरी, सिराहा, धनुषा, सर्लाही, रौतहट, महोत्तरी, बारा र पर्सामा आज मतदान भएको हो । सवै जिल्लाहरुमा उल्लेख्य संख्यामा मतदान भएको निर्वाचन आयोगले जनाएको छ । निर्वाचन आयोगकाअनुसार ७० देखि ७२ प्रतिशतसम्म मतदान भएको छ । २ नम्बर प्रदेशमा १ महानगर, ३ उपमहानगर, ७३ नगरपालिका र ५९ गाउँपालिका छन् । ६ हजार ६ सय २७ पदका लागि ३७ हजार २ सय ३६ जना उम्मेदवार चुनावी प्रतिस्पर्धामा छन् ।
२ नम्बर प्रदेशमा २६ लाख ६४ हजार ९ सय ५० मतदाता छन् । निर्वाचनलाई ध्यानमा राख्दै ७० हजार सुरक्षाकर्मी परिचालन गरिएको गृहमन्त्रालयले जनाएको छ । यस्तै मतदान केन्द्रमा ३१ हजार ५ सय कर्मचारी खटाईएको निर्वाचन आयोगले जनाएको छ । साँझ ५ बजे सम्म चल्ने मतदानका लागि ३ हजार ५ सय ७८ मतदान केन्द्र तोकिएका छन् ।
