अमेरिकाले रुसी राष्ट्रपति भ्लादिमिर पुटिनका नजिकका सहयोगीमाथि प्रतिबन्ध लगाएको छ ।
अमेरिकाले रुसी राष्ट्रपति पुटिनका सात जना नजिकका सहयोगी, १७ जना वरिष्ठ सरकारी अधिकारी तथा केही रुसी कम्पनीमाथि पनि प्रतिबन्ध लगाउने घोषणा गरेको बीबीसीले जनाएको छ । प्रतिबन्ध लगाउने घोषणा गरेका रुसी व्यक्ति तथा कम्पनीमाथि विश्वभर हानिकारक गतिविधि सञ्चालन गरेको अमेरिकाले आरोप लगाएको छ । प्रतिबन्ध लाग्नेमा राष्ट्रपति पुटिनका बडीगार्ड र ज्वाईँ पनि रहेका छन् ।
अमेरिकाले रुसका उच्च स्तरका व्यक्तिका १२ कम्पनी, सरकारी हतियार निर्यात गर्ने कम्पनी तथा एउटा बैंकमा प्रतिबन्ध लगाएको हो । अमेरिकाले प्रतिबन्ध मात्रै लगाएको तर यसको अर्थ रुससँग सम्बन्ध तोडिएको भन्ने नरहेको अमेरिकी राष्ट्रपति कार्यालय ह्वाइट हाउसले जनाएको छ । अमेरिकी प्रतिबन्धको आलोचना गर्दै रुसले कडा कदम चाल्ने चेतावनी दिएको छ ।
