पूर्वप्रधानमन्त्री एवं नयाँ शक्ति पार्टीका संयोजक डा. बाबुराम भट्टराई प्राज्ञिक भ्रमणका लागि मंगलवार साँझ अमेरिका प्रस्थान गर्ने नयाँ शक्तिको प्रचार विभागले जनाएको छ ।
उनी भट्टराईको अमेरिका भ्रमण अध्ययनमा केन्द्रित हुने बताइएको छ ।
‘उहाँले यो भ्रमण मुख्यत: केही प्रश्नहरूका साथ गर्दै हुनुहुन्छ, ‘विश्वभर नै नवउदारवादी लोकतन्त्र र राज्य–समाजवाद/साम्यवाद दुबै राजनीतिक प्रणालीमा देखिएको संकटको कारण के हुन सक्छ ? के यो २१औं शताब्दीमा नयाँ राजनीतिक विचार र वैकल्पिक राजनीतिक शक्तिको जन्मको पूर्वसूचक हुनसक्छ ? नेपाल जस्ता भर्खरै लोकतन्त्रको स्थापना भएका देशहरूमा लोकतन्त्रलाई अधिक समावेशी, सहभागितामूलक र जनउत्तरदायी कसरी बनाउन सकिन्छ ? नेपालजस्ता अतिकम विकसित देशहरुलाई निकै छोटो समयमा नै विकसित र समृद्ध देशमा कसरी रुपान्तरण गर्न सकिन्छ ? अरु विकसित देशको अनुभवबाट के सिक्न सकिन्छ ? यिनै प्रश्नहरूको वरिपरि रहेर उहाँले भ्रमणका क्रममा अन्तरक्रिया गर्नुहुनेछ,’ नयाँ शक्ति प्रचार विभागद्वारा जारी विज्ञप्तिमा जनाइएको छ ।
भ्रमणका क्रममा उनले अमेरिकाका विभिन्न राज्यहरुमा पुगी सम्भव भएसम्म त्यहाँका प्रवुद्ध/प्राज्ञिक व्यक्तित्वहरू, नीति निर्माता, चिन्तक, प्राध्यापक, दक्षिण एसियाका बारेमा जानकारी राख्ने स्तम्भकार तथा लेखक, विकासका क्षेत्रमा कार्यरत व्यक्तित्व र प्रवासी नेपाली तथा दक्षिण एसियालीहरूसँग पनि अन्तरक्रिया गर्ने कार्यक्रम छ ।
भट्टराईको अमेरिका भ्रमणको सम्पूर्ण व्यवस्थापन गैह्र–आवासीय नेपाली संघले गर्नेछ । नयाँ शक्तिकी नेतृ एवं भट्टराईपत्नी हिसिला यमी भ्रमणमा सहभागी हुनेछिन् ।
भ्रमण पूरा गरी डा. भट्टराई असोज २२ गते नेपाल फर्किने छन् ।
