काठमाडौं, २१ बैशाख । प्रधानमन्त्री केपी शर्मा ओलीले कोरोना भाइरसको जोखिमको चुनौती उत्तिकै रहेकोले अहिले नै लकडाउन खुलाउनेदेखि अन्य धेरै पक्षमा हतार नहुने प्रष्ट पार्नु भएको छ ।
उहाँले जोखिम न्यूनीकरणका लागि अपनाइएका उपायहरु पक्कै कठोर हुनसक्छन् तर रोग भित्रिन नदिनका लागि सबैले कठोर परीक्षा पास गर्न बाँकी नै रहेको बताउनु भएको हो ।
उहाँले तत्काल छिमेकी मुलुक भारतमा अलपत्र परेका नेपालीहरुलाई ल्याउन स्वास्थ्यको हिसाबले जोखिमपूर्ण भएको पनि प्रष्ट पार्नुभयो ।
आइतबार बसेको मन्त्रिपरिषद् बैठकमा मन्त्रीहरुले भारतमा अलपत्र नेपालीहरुलाई के गर्ने ? भन्ने प्रश्न उठाएसँगै प्रधानमन्त्री ओलीले १२ सय मान्छे ल्याउने निर्णय गर्दा २ हजार आउने बताउनुहुँदै भारतमा रहेका नेपालीहरुलाई ल्याउनु स्वास्थ्यको हिसाबले जोखिमपूर्ण हुने प्रष्ट पार्नुभयो ।
त्यस्तै, प्रधानमन्त्री ओलीले सीमा नाकामा रहेका नेपालीलाई ल्याउन खोज्दा दिल्लीमा रहेका मानिसहरु पनि हिँड्न थाल्ने भएकाले अहिले तत्कालै भारतमा रहेका नेपालीहरुको उद्दार सम्वभ नभएको बताउनुभयो ।
यसैबीच उहाँले भारतबाट कोरोना भित्रिन नदिन सीमानाकामा अझै कडाइ गर्न निर्देशन दिनुभएको छ । भारतमा समस्यामा परेका नेपालीहरुलाई भारतस्थित नेपाली दूताबासले हेर्ने गरी परराष्ट्र मार्फत निर्देशन दिइने मन्त्रिपरिषदको निश्कर्ष रहेको जानकारी गराइएको छ ।
